ചായ്യോത്ത് ജ്യോതി ഭവൻ സ്പെഷ്യൽ സ്കൂളിന് ഇലക്ട്രിക് ഓട്ടോറിക്ഷ നൽകി മുത്തൂറ്റ് ഫിനാൻസ്

മുത്തൂറ്റ് ഫിനാൻസിന്റെ സിഎസ്ആർ പ്രവർത്തനങ്ങളുടെ ഭാഗമായി നിലേശ്വരം ചായോത്തെ ജ്യോതി ഭവൻ സ്പെഷ്യൽ സ്കൂളിന് ഇലക്‌ട്രിക് ഓട്ടോറിക്ഷ കൈമാറി. 

കാസർഗോഡ്, കണ്ണൂർ ജില്ലകളിൽ നിന്നുള്ള കേൾവിശേഷിയില്ലാത്ത 57 കുട്ടികളാണ് ജ്യോതി ഭവൻ സ്കൂളിൽ പഠിക്കുന്നത്. ഇതിൽ 30 പേർ സ്കൂൾ ഹോസ്റ്റലിൽ താമസിച്ചാണ് പഠിക്കുന്നത്. മറ്റ് 27 പേരും ദൂരെയുള്ള ഗ്രാമീണ മേഖലകളിൽ നിന്ന് ദിവസവും യാത്ര ചെയ്താണ് എത്തുന്നത്. പലപ്പോഴും പൊതുഗതാഗത സംവിധാനങ്ങളാണ് ഇവർക്ക് ആശ്രയം. സ്കൂൾ സ്വന്തം നിലയിലാണ് കുട്ടികളുടെ യാത്രാസൗകര്യം ഒരുക്കുന്നത്. ഇത് സ്കൂളിന് പ്രതിമാസം വലിയ സാമ്പത്തിക ബാധ്യതയും പ്രവർത്തനത്തിന് ബുദ്ധിമുട്ടുകളും നേരിടേണ്ടി വരുന്നു.

ഇതോടെയാണ് വിദ്യാർത്ഥികൾക്ക് സ്ഥിരവും സുരക്ഷിതവും പരിസ്ഥിതി സൗഹൃദവുമായ യാത്ര ഉറപ്പാക്കുന്നതിനായി ഒരു ഇലക്ട്രിക് ഓട്ടോറിക്ഷ വാങ്ങുന്നതിനായി മുത്തൂറ്റ് ഫിനാൻസ് സാമ്പത്തിക പിന്തുണ നൽകിയത്. ഈ വാഹനം ദിവസവും ഏകദേശം 70 കിലോമീറ്റർ ദൂരം മൂന്ന് റൂട്ടുകളിലായി സഞ്ചരിക്കും. ഇത് കുട്ടികളുടെ ഹാജർ നില മെച്ചപ്പെടുത്താനും അവർക്ക് വിദ്യാഭ്യാസ ലഭ്യത ഉറപ്പാക്കാനും സഹായിക്കും.

മുത്തൂറ്റ് ഫിനാൻസിന്റെ കോഴിക്കോട് റീജിയണൽ മാനേജർ ദീപേന്ദ്രു ഹരീഷ് ആർ വാഹനം കൈമാറി. സിഎസ്ആർ മാനേജർ ജാൻസൻ വർഗീസ്, ജ്യോതി ഭവൻ സ്‌കൂൾ പ്രധാനധ്യാപിക സിസ്റ്റർ ഫിൻസി, കാഞ്ഞങ്ങാട് ബ്രാഞ്ച് മാനേജർ രാജേഷ് കെ, കോഴിക്കോട് റീജിയണൽ മാർക്കറ്റിംഗ് മാനേജർ രാജേഷ് കുമാർ കെ, കണ്ണൂർ ഫോർട്ട് റോഡ് ബ്രാഞ്ച് മാനേജർ സുധീഷ്, സ്കൂൾ പിടിഎ പ്രസിഡന്റ് രാജേഷ് കെ. ജെ തുടങ്ങിയവർ പങ്കെടുത്തു.